Madaxweynaha Soomaaliya, Xasan Sheekh Maxamuud ayaa sheegay inuu soo gaabiyey socdaal uu ku joogay dalka Jamhuuriyadda Jabuuti,kadibna uu dib ugu soo laabtay dalka, si uu uga qeyb qaato, una horkaco dedaalada dowladda soomaaliya ay dib u eegis ugu sameyneyso xaaladda amniga ee magaalada Muqdisho oo ay dhawaan ka dhaceen weeraro kale oo kala duwan oo geystay khasaare isugu jira dhimasho iyo dhaawac.
Madaxweynaha ayaa sidoo kale sheegay inuu dib u dhigay safar rasmi ah oo uu ku tegi lahaa magaalada Stockholm ee dalka Sweden 1-da ilaa 3-da bisha March 2016,booqashadaasi oo looga gol lahaa xoojinta xiriirka iyo iskaashiga labada dale e Soomaaliya iyo Sweden.
Sida lagu sheegay qoraal ka soo baxay xaafiiska madaxweynaha,waxaa Madaxweynaha u qorsheysneyd inuu kulamo la yeesho Boqorka Sweden, Ra'iisul Wasaaraha iyo xubno ka tirsan xukuumadda Sweden, iyagoo kawada hadlilahaa xaaladda dalka soomaaliya gaar ahaan horumarka ay dowladda Soomaaliya ka sameysey dhinacyada siyaasadda, dib u heshiisiinta, xoojinta taageerada Sweden ee dhinaca maalgashiga dhaqaalaha gaarka ah iyo arrimo kale sida qoraalka lagu sheegay.
Qoraalka ayaa sidoo kale lagu sheegay in Madaxweyne Xasan Sheekh Maxamuud uu shacabka iyo dowladda Sweden uga mahad celiyay martiqaadka loo fidiyey, balse waxaa uu si weyn uga xun yahay dib u dhaca ku yimid socdaalkiisa, sababo la xiriira xaalado soo kordhey awgood, isagoo xusay in marka ay xaaladda saamaxdo uu tagi doono dalka Sweden.
from NEWS AND ENTERTAINMENT http://ift.tt/1UvLbC6
via IFTTT
No comments:
Post a Comment